Home
ગુજરાત
ગુજરાતમાં ઠુંઠવાતી ઠંડી વચ્ચે કમોસમી વરસાદ પડવાની આગાહી, આ ત્રણ દિવસ માવઠુ પડે તેવી ભીતિ

ગુજરાતમાં ઠુંઠવાતી ઠંડી વચ્ચે કમોસમી વરસાદ પડવાની આગાહી, આ ત્રણ દિવસ માવઠુ પડે તેવી ભીતિ

02:53 PM December 23, 2024 Gujju News Channel

Gujarat weather update : રાજ્યમાં કડકડતી ઠંડી વચ્ચે વરસાદ પડે તેવી આગાહી કરવામાં આવી છે. ક્રિસમસના લગભગ 3 ત્રણ દિવસ સુધી અનેક જિલ્લાઓમાં વરસાદી ઝાપટા પડી શકે છે. આ વેસ્ટર્ન ડિસ્ટર્બન્સને લીધે વાતાવરણમાં પલટો જોવા મળ્યો છે.

Gujarat weather update: ગુજરાત રાજ્યમાં કડકડતી ઠંડી વચ્ચે હવે ધોધમાર વરસાદ પડી શકે એવી હવામાન વિભાગે આગાહી કરી દીધી છે. એટલે આ ઠંડીના ચમકારા વચ્ચે પલળવાની નોબત પણ આવી શકે છે. લાંબા સમયથી હવામાન નિષ્ણાંતો કહી રહ્યા છે કે અત્યારે ધોધમાર વરસાદ સાથે માવઠુ પણ પડી શકે છે. ત્રણ દિવસ સુધી ગુજરાત રાજ્યના ઉત્તર અને મધ્ય ભાગમાં માવઠુ પડી શકે છે. ઉલ્લેખનીય છે કે અમદાવાદથી લઈ કચ્છ અને સૌરાષ્ટ્ર સુધી ઠંડીનો ચમકારો જોવા મળ્યો છે. તેવામાં હવે અચાનક જો વાતાવરણમાં પલટો આવે અને વરસાદ પડવાની આગાહી થાય તો લોકોના જનજીવન પર પણ આની અસર થઈ શકે છે.

► ઠંડી વચ્ચે માવઠું, 25, 26 અને 27 ડિસેમ્બરની આગાહી

હવામાન નિષ્ણાતોએ આગાહી કરી છે કે આગામી સમયમાં ક્રિસમસ પછી વાતાવરણમાં પલટો આવી શકે છે. એટલે ફરી એકવાર ગુજરાતમાં માવઠુ પડવાની શક્યતાઓ વ્યક્ત કરવામાં આવી રહી છે. 21થી 28 ડિસેમ્બર વચ્ચે ગુજરાત રાજ્યના અનેક જિલ્લાઓમાં વરસાદ ખાબકી શકે છે. અહીં વરસાદી ઝાપટા પણ પડશે અને ખાસ કરીને 25, 26 અને 27 ડિસેમ્બર સુધી મોટાભાગના વિસ્તારોમાં ઠંડી વચ્ચે મેઘરાજા તોફાની બેટિંગ કરી શકે છે.

► વેસ્ટર્ન ડિસ્ટર્બન્સના લીધે મજબૂત વરસાદી સિસ્ટમ એક્ટિવ

દ.ભારતમાં અત્યારે ઈશાનનું ચોમાસું ચાલી રહ્યું છે. જેથી કરીને હવે બેક ટુ બેક વરસાદી સિસ્ટમ પણ સક્રિય થઈ રહી છે. અહીં એક મજબૂત વરસાદી સિસ્ટમ પસાર થવા જઈ રહી છે જેની અસર ગુજરાતમાં અને ઉત્તર ભારતના પણ ઘણા રાજ્યોમાં થઈ શકે છે. વેસ્ટર્ન ડિસ્ટર્બન્સના લીધે પણ ગુજરાતમાં અનેક જિલ્લાઓમાં મેઘરાજા ધબધબાટી બોલાવી શકે છે. બીજી બાજુ ઉત્તર ભારતમાં પણ આની અસરથી હિમવર્ષા થવાની સંભાવના છે.

► ગુજરાતના ક્યા વિસ્તારમાં સાયક્લોનિક સર્ક્યુલેશન?

આ તમામ પરિબળો પર નજર કરીએ તો મધ્ય અને ઉત્તર ગુજરાત તથા રાજસ્થાન પર આગામી સમયમાં એક સાયક્લોનિક સર્ક્યુલેશન બની રહ્યું છે. આના લીધે ગુજરાતનાં હવામાનમાં પલટો આવશે અને ઠેર ઠેર ઘણા વિસ્તારોમાં માવઠાનો વરસાદ પણ ખાબકી જશે. ક્રિસમસ પહેલા પણ ગુજરાતમાં ઠેર ઠેર વરસાદી માહોલ અને વાદળછાયુ વાતાવરણ જોવા મળી શકે છે. મધ્ય ગુજરાત અને ઉત્તર ગુજરાતના ભાગોમાં પણ વાદળછાયુ વાતાવરણ થઈ જાય એમ લાગી રહ્યું છે. 25, 26 અને 27 ડિસેમ્બરે ઘણા પ્રદેશોમાં માવઠુ પડી શકે છે. આની મોટાભાગની અસર રાજસ્થાન બોર્ડર પાસે આવેલા ગુજરાતના રાજ્યો પર પણ જોવા મળી શકે છે.

► માવઠાનું સૌથી વધુ જોખમ આ વિસ્તારમાં જોવા મળશે!

વાવ, થરાદ, ધાનેરા, ઈડર, વડાલી, અમીરગઢ અને ઈકબાલગઢમાં માવઠાની તીવ્રતા વધુ રહેલી છે. આની સાથે જ સાબરકાંઠા, બનાસકાંઠા, મહેસાણા, પાટણમાં ત્રણેય દિવસ વરસાદી માવઠા પડવાની શક્યતાઓ રહેલી છે. અરવલ્લીમાં હળવો તથા સામાન્ય વરસાદ પડશે. ત્યારે અમુક વિસ્તારોમાં મધ્યમથી ભારે ઝાપટા પડે તેવી શક્યતા છે. મહીસાગરમાં લુણાવાડા આસપાસનાં વિસ્તારોમાં મધ્યમથી ભારે વરસાદી ઝાપટા પડી શકે છે. છોટાઉદેપુર, દાહોદ, ગોધરા જ્યારે અમદાવાદ-ગાંધીનગરમાં હળવા છૂટાછવાયા સામાન્ય વરસાદી ઝાપટા પડશે. ભરૂચ, ડાંગ, વલસાડ તથા કચ્છમાં પણ આ વાતાવરણમાં પલટાની અસર જોવા મળશે. અહીં વાદળછાયુ વાતાવરણ રહેશે અને વરસાદ પણ ખાબકશે. સૌરાષ્ટ્રમાં ભાવનગર, બોટાદ અને સુરેન્દ્રનગરમાં હળવાથી સામાન્ય તથા અન્ય કેટલાક વિસ્તારોમાં માવઠાનું વધુ જોખમ જોવા નહીં મળે.